Улсын онцгой комиссын ажлын хэсэг өнөөдөр хуралдаж дархлаажуулалтын асуудлаар тодорхой шийдвэрүүд гаргажээ. Энэ талаар Засгийн газрын хэвлэл мэдээллийн албаны дарга Ц.Ганзориг, нийслэлийн Засаг даргын нэгдүгээр орлогч бөгөөд нийслэлийн Онцгой комиссын шуурхай штабын дарга Р.Чингис, ЭМЯ-ны төрийн нарийн бичгийн дарга Эрдэмбилэг, Нийслэлийн Эрүүл мэндийн газрын дарга Б.Бямбадорж нар мэдээлэл хийлээ.
Одоогоор улсын хэмжээнд нийт иргэдийнхээ 31 хувийг дархлаажуулалтад хамруулаад байгаа юм байна. Маргаашнаас нийслэлийн хэмжээнд дархлаажуулалтын 120 цэгт 281 баг 1890 эмч, эрүүл мэндийн ажилтан ажиллаж, өдөрт 59803 иргэнийг хамруулахаар төлөвлөжээ. Мөн 40 автобусаар явуулын дархлаажуулалтыг зохион байгуулах юм байна. Вакцины хангамжийн хувьд БНХАУ-аас өнөө орой 300 мянган тун вакцин буусан бол өнөө шөнө дахин 300 мянган тун бууна. Маргааш мөн 300 мянган тун вакцин буух юм байна.
Дархлаажуулалтад эхний ээлжид хоёрдугаар тунгаа хийлгэх хүмүүс хамрагдах юм байна. Нэг дүүрэгт дунджаар дархлаажуулалтын 10 цэг ажиллаж байгаа тул тухайн иргэн гэртээ хамгийн ойр байгаа цэгүүддээ нийтийн тээврийн унаа хэрэглэлгүйгээр алхаж очоод вакцинаа хийлгэх боломжоор хангана гэдгийг Нийслэлийн Эрүүл мэндийн газрын дарга хэллээ. Дөрөвдүгээр сарын 22-ны байдлаар вакцины нэгдүгээр тунгаа хийлгэсэн 649236, хоёрдугаар тунгаа хийлгэсэн 64469 хүн байгаа юм байна.
Вакцины хоёр дахь тунгаа хийлгэсэн хүнд 14 хоногт дархлаа тогтоно гэж үзэж байгаа тул энэ хугацаа нь өнгөрсний дараа хөл хорионы хязгаарлалтаас гаргах, хэвийн нөхцөлөөр ажиллах боломжоор хангах талаарх журмыг УОК боловсруулж байгаа юм байна. Одоогоор хоёр дахь тунгаа тариулсан иргэдээс ковидоор өвдсөн тохиолдол байхгүй, нэгдүгээр тунгаа тариулсан иргэдээс 1200 гаруй хүн ковидын халдвар аваад байгаа аж.
