Цаг уурын байгууллагын ирүүлсэн мэдээлэлээр манай орны ихэнх гол, мөрөн, нуур битүү мөсөн бүрхүүлтэй байна. Гэхдээ гол мөрний дунд болон адгаар мөс аажмаар хайлж, харз, тошин үүсэх, мөс харлах, мөсөн дээгүүр ус урсах, мөс байрандаа хайлах зэрэг үзэгдэл ажиглагдаж мөс хэврэгшин нимгэрч байгаа юм.
Иймд цаг хожих, зам товчлох зэргээр мөсөн дээгүүр явах болон авто тээвэр хийхгүй байхыг Онцгой байдлын байгууллагаас онцгойлон анхааруулж байна. Мэргэжлийн байгууллагын энэ анхааруулга зөвлөмжийг үл ойшоож, гол мөрний мөсөн дээгүүр зорчсоноос амь нас, эрүүл мэндээ эрсдэлд оруулах тохиолдол гарсаар байна. Тухайлбал, урьд шөнө буюу дөрөвдүгээр сарын 3-наас 4-нд шилжих шөнө Хэнтий аймгийн таван иргэн Хэрлэн гол дээгүүр явган гарч байгаад цөмөрч, гурав нь хөл алдан живж байхад нь Онцгой байдлын албан хаагчид амийг нь аварчээ.
