Японы мэргэжлийн сүмо бөхийн холбооноос гуравдугаар сарын башёгийн банзүкэ буюу оноолтыг гаргажээ. Энэ сарын башёгийн зүүн жигүүрийг их аварга Хакүхо М.Даваажаргал, баруун жигүүрийг их аварга Какүрюү М.Ананд нар тэргүүлэхээр болжээ. Их аварга Хакүхогийн хувьд коронавирусийн халдвар авсны улмаас өнгөрсөн нэгдүгээр сарын башёд барилдаж чадаагүй юм. Тэрбээр ийнхүү нэгдүгээр сарын башёг өнжих болсондоо ихээхэн бухимдсан байна. Учир нь их аварга өнгөрсөн жилийн сүүлийн гурван башёг бэртлийн улмаас орхисон тул нэгдүгээр сарын башёд түрүүлэх зорилт тавин бэлтгэлээ маш чамбай базаагаад байсан ажээ.
Юутай ч их аварга Хакүхогийн хувьд гуравдугаар сарын башёг тэргүүлэн барилдах бөгөөд башёгийн үеэр буюу гуравдугаар сарын 11-нд тэрбээр 36 нас хүрэх юм. Хакүхо гуравдугаар сарын башёд сайн барилдаж хүчтэй гэдгээ харуулж чадна хэмээн ярьжээ. Тэрбээр сүмогийн дээд зиндаанд 44 удаа түрүүлээд байгаа билээ.
Гуравдугаар сарын башёгийн банзүкэд Монголын хоёр их аваргын дараа озэки Шодай, Асанояма, Такакэйшо нар эрэмбэлэгдсэн байна. Харин сэкивакэ Тэрүнофүжи Г.Ган-Эрдэнэ озэки нарын дараа эрэмбэлэгдэн зүүн жигүүрээс босч барилдахаар болжээ. Дээд зиндаанд барилдах бусад монгол бөхчүүдийн хувьд Кирибаяма Б.Лхагвасүрэн маэгаширагийн зүүн жигүүрийн дөрөвт, Тамаваши Б.Мөнх-Оргил маэгаширагийн зүүн жигүүрийн зургаад, Ичиножо А.Ичинноров маэгаширагийн баруун жигүүрийн зургаад, Хоошорюү С.Бямбасүрэн маэгаширагийн баруун жигүүрийн 9-т, Чиёошома Г.Мөнхсайхан маэгаширагийн баруун жигүрийн 13-т тус тус эрэмбэлэгджээ.
