АН-ын залуучууд нэгдэж өнөөдөр хэвлэлийн бага хурал зарлалаа. Хэвлэлийн бага хуралд УИХ-ын гишүүн асан Х.Тэмүүжин, АН-ын дэд дарга асан Б.Жаргалан, тус намын генсек асан Ц.Баатархүү, Баянзүрх дүүргийн ИТХ-ын төлөөлөгч М.Тулгат тэргүүтэй залуучууд оролцож, намынхаа удирдах дээд байгууллага ҮБХ-г яаралтай зарлан хуралдуулахыг шаардаж байгаагаа мэдэгдлээ. Мөн цар тахалтай энэ эмзэг үед эрх баригчдад хяналт тавихын зэрэгцээ АН-д итгэл хүлээлгэсэн иргэдийнхээ дуу хоолойг төрд хүргэх ёстой гэж үзэж байгаагаа илэрхийлэв.
АН-ын төлөөллийн төв байгууллага болох ҮБХ-ны гишүүдийн талаас илүү хувь нь энэхүү шаардлагыг дэмжиж гарын үсгээ зурсан байна. Тиймээс ҮБХ-г яаралтай хуралдуулах ёстойг онцоллоо. Төрд эрүүл саруул хяналт хэрэгтэй. Сөрөг хүчний хяналтыг бий болгохын тулд АН өөрийнхөө толгой дээрх бухлыг олж харах хэрэгтэй гэдгийг хэвлэлийн бага хуралд оролцогчид хэлэв.
