МҮОНРТ-ийн Үндэсний зөвлөл өнөөдөр хуралджээ. Энэ оны нэгдүгээр сарын 01-нээс шинэ удирдлага, бүрэлдэхүүнтэйгээр ажиллаж эхлээд буй Үндэсний зөвлөл хурлаараа МҮОНРТ-ийн Үйлдвэрчний эвлэл болон ажилчдынх нь шаардлагын дагуу саяхан ерөнхий захирлаар томилогдсон Н.Дэмбэрэлийн асуудлыг хэлэлцэж, түүнийг үүрэгт ажлаас нь чөлөөлөх шийдвэр гаргасан байна. Н.Дэмбэрэл нь өнгөрсөн арванхоёрдугаар сарын 21-нд уг албан тушаалд томилогдсон юм.
Түүний оронд Г.Гэрэлийг МҮОНРТ-ийн ерөнхий захирлын үүрэг гүйцэтгэгчээр томилох шийдвэр гаргажээ.
МҮОНРТ-ийн Ерөнхий захирлаар сар хүрэхгүй хугацаанд ажиллаад чөлөөлөгдөж буй Н.Дэмбэрэл нь хүүхдийн эмч, эдийн засагч мэргэжилтэй бөгөөд 2006-2008 онд Засгийн газрын Хэвлэл мэдээллийн албаны дарга, 2012 оноос МАН-ын Хэвлэл мэдээлэл, олон нийттэй харилцах газрын дарга, 2015 онд МАН-ын Ерөнхий нарийн бичгийн даргын зөвлөх, 2018 оноос Ерөнхий сайдын дэргэдэх Үндэсний брэндийн зөвлөлийн ажлын албаны даргаар тус тус ажиллаж байжээ.
Эргэн сануулахад өнгөрсөн 2020 оны арванхоёрдугаар сарын 21-нд болсон МҮОНРТ-ийн Ерөнхий захирлын сонгон шалгаруулалтад,
- МҮОНР-ийн дэд захирал Г.Гэрэл
- “Саунд Монголиа” компанийн гүйцэтгэх захирал М.Уянга
- МҮОНРТ-ийн сэтгүүлч Г.Агааноров,
- ММ агентлагийн захирал асан Р.Гандиймаа,
- ММ агентлагийн редактор асан А.Энхтуул,
- Үндэсний брэндийн ажлын албаны дарга Н.Дэмбэрэл,
- УИХ-ын даргын зөвлөх, сэтгүүлч С.Баярмөнх,
- ММ агентлагийн хөтлөгч Г.Чоглоонамжил,
- ТВ5 захирал асан Э.Дагиймаа
- МҮОНРТ-ийн сэтгүүлч Б.Цондовдорж,
- МҮОНРТ-ийн сэтгүүлч А.Бүрэнбаатар,
- “Плэй бой” сэтгүүлийн эрхлэгч Н.Болормаа,
- МҮОНРТ-ийн нэвтрүүлэгч Ш.Бямбацогт
- Харилцаа холбоо зохицуулах С.Адьяасүрэн
- Монгол брэнд холбооны тэргүүн Ш.Отгон-Өлзий
- МАН-ын Хэвлэл мэдээллийн албаны дарга А.Энхзул
- “Эрдэнэс Тавантолгой” компанийн Хэвлэл мэдээлэл, олон нийттэй харилцах хэлтсийн дарга М.Амарбаяр нарын 17 хүн нэрээ дэвшүүлэн өрсөлдсөн юм.
