Их аварга Какүрюү М.Ананд шинэ оны эхний башёд амжилттай барилдахаар хичээж, бэлтгэлээ базааж байгаа ажээ. Тэрбээр өнгөрсөн даваа гараг буюу 28-ны өдөр 2020 оны сүүлчийн бэлтгэлээ хийжээ. Сүүлийн гурван удаагийн башёг дундаас нь орхихоос өөр аргагүй байдалд хүргэсэн олон бэртэл гэмтлийг тэрбээр даван туулах болно гэдэгтээ итгэлтэй байгаа гэнэ.
Японы иргэншилтэй болсноосоо хойш эхний башёдоо энэ сард зодоглох гэж буй Их аварга Какүрюү М.Ананд нэгдүгээр сарын 10-нд эхлэн башёд бэлтгэхийн тулд асар их хичээж, хөлсөө дуслуулан бэлтгэлээ хийж байгаа гэж түүний дэвжээний багш Мичиноку хэлжээ. Тэрбээр “Энэ удаагийн башёд тэр өрсөлдөх нь тодорхой. Тэр одоо хүртэл бэртэлтэй байгаа тул бид түүний нөхцөл байдлыг эцсийн мөч хүртэл хянах болно” хэмээсэн байна.
Нуруу болон тохойн гэмтлүүд нь Их аварга Какүрюү М.Анандыг гурван башё дараалан өнжихөд хүргэсэн. Хакүхо Их аваргын хамт тэрбээр өнгөрсөн сард Ёкозүнагийн зөвлөлдөх зөвлөлөөс энэ хэвээр байвал зодог тайлах “анхааруулга” авсан нь хатуу сануулга болсон. Эдүгээ 35 настай Их аварга Какүрюүгийн хувьд зодог тайлахад эрт байгаа тул ийнхүү бэлтгэлээ тун чамбай бас болгоомжтой хийж байгаа ажээ.
