“Их-20”-ийн орнуудын аялал жуулчлалын сайд нар өчигдөр цахимаар хуралдаж, коронавирусийн цар тахлын улмаас хямралд хүчтэй нэрвэгдсэн аялал жуулчлалын салбарыг сэргээх арга замын талаар ярилцжээ. Тэд нийгэм, эдийн засгийн тогтвортой хөгжилд хүрэхэд аялал жуулчлалын шийдвэрлэх үүрэгтэй гэдгийг онцолж, цар тахлын улмаас энэ салбарт тулгарч буй бэрхшээлүүд, түүнийг хэрхэн даван туулах талаар санал солилцсон байна.
Сайд нар салбар дахь хямралд хамгийн их нэрвэгдсэн хүмүүсийг, тэр дундаа бичил, жижиг, дунд үйлдвэрлэл эрхлэгчид, ялангуяа Африк болон жижиг арлын улс орнуудын хөгжиж буй эдийн засгийг дэмжих чиглэлээр хамтран ажиллахаа амлажээ. Мөн олон улсын хамтын ажиллагааг бэхжүүлж, аялал жуулчлалд итгэх итгэл, итгэлцлийг сэргээж, улс орнуудын хооронд мэдлэг, сайн туршлагаа хуваалцах замаар энэхүү салбарыг сэргээх нь чухал гэдэгт санал нэгджээ. Хурлаас гаргасан мэдэгдэлд “Их 20”-ийн бүлэг аялал жуулчлалын салбарыг сэргээн хөгжүүлж, цаашид цар тахлын дараах дэлхийн эдийн засгийн сэргэлтийг түргэтгэхэд тус салбарын нөлөө, оролцоо, нөөц бололцоог нэмэгдүүлнэ гэж онцолсон байна.
Аялал жуулчлалын салбар өнгөрсөн 2019 онд дэлхийн дотоодын нийт бүтээгдэхүүний 10.3 хувийг бүрдүүлж, 330 сая хүнийг ажлын байраар хангажээ. Харин энэ жил ч коронавирусийн цар тахлаас үүдэн олон улсын түвшинд аялал жуулчлалыг хориглож, хөл хорио, хязгаарлалт тогтоосны улмаас тус салбар уналтад ороод байгаа юм.
