Майк Помпео Монгол, Солонгост хийх айлчлалаа цуцалжээ

АНУ-ын Төрийн нарийн бичгийн дарга Майк Помпео Азийн зарим орнуудад хийх байсан айлчлалаа цуцалжээ. Тэрбээр өнөөдөр Япон улсад айлчлал хийх бөгөөд энэ хүрээнд Австрали, Энэтхэг, Японы албаны хүмүүстэй дөрвөлсөн уулзалт хийх юм байна. Үүгээр айлчлалаа өндөрлөн шууд нутаг буцахаар болсон байна. Үүний шалтгаан нь АНУ-ын Ерөнхийлөгч Дональд Трамп “COVID-19” цар тахлаар өвдсөнтэй холбоотой юм. Дональд Трамп өнгөрсөн баасан гарагт коронавирусийн халдвартай гэдэг нь оношлогдож, цэргийн төв эмнэлэгт хэвтэн эмчлүүлж буй. Майк Помпео ирэх лхагва гаригт Монгол Улсад айлчлахаар төлөвлөж байснаа ийнхүү цуцалжээ. Тэрбээр мөн БНСУ-д хийх байсан айлчлалаа ч цуцалсан байна.