Японы мэргэжлийн сүмогийн есдүгээр сарын барилдаан аки башё сүүлийн 37 жилийн түүхэнд анх удаа их аваргуудгүйгээр эхэллээ. Эхний өдөр өнгөрсөн долоодугаар сарын нагоя башёд түрүүлж эзэн хааны цомыг хоёр дахь удаагаа гардсан монгол сүмоч Тэрүнофүжи Г.Ган-Эрдэнэ озэки Такакэйшо өвдөг шорооджээ. Тэрбээр өнгөрсөн башёд маэгаширагийн 17-гоос босож барилдан түрүүлснээр энэ сард маэгаширагийн зүүн жигүүрийн нэгдүгээрт эрэмбэлэгдээд байгаа юм. Тиймээс эхний өдрөөс л өндөр цолтнуудтай оноолт таарч байгаа нь энэ юм.
Өнөөдөр маэгаширагийн барууны хоёрт бичигдсэн Тамаваши Б.Мөнх-Оргил, зүүний тавд эрэмбэлэгдсэн Кирибаяма Б.Лхагвасүрэн, анх удаа дээд зиндаанд дэвшин барууны 16-аас босож барилдаж буй Хоошорюү С.Нямсүрэн нар учраагаа давжээ. Харин зүүний 17-д бичигдсэн Ичиножо А.Ичинноров өвдөг шороодсон байна.
