Зураач Б.Тэмүүлэн, Ш.Сүхбат нарын хамтарсан үзэсгэлэнгийн нээлт “Norphei” арт галерейд өнөөдөр болно. Тэд үзэсгэлэнгээ “Хязгааргүй” хэмээн нэрийдсэн бөгөөд энэ сарын 27-ныг дуустал үзэгчдэд хүргэхээр болсон байна. Зохион байгуулагчид уран бүтээлчдийн үзэсгэлэнгийн талаар мэдээлэхдээ “Хязгааргүйн тухай ойлголт нь аливаад цар хүрээ, төгсгөл байхгүйг илэрхийлнэ. Хязгааргүй нь бодит амьдралд байхгүй мэт. Бид өөрсдөө олж, нээж танин мэдэж, өөр өөрийнхөөрөө мэдрэх юм байна. Хүн гэдэг эрх дураараа хөдөлж, энэ ертөнцийг туулж, өрөөл бусадтайгаа харилцан ойлголцож, тархиараа эргэцүүлэн бодож, бусадтай санал бодлоо солилцож, бусдад нөлөөлж, бас нөлөөнд автаж, нийгэмд холилдон явах амьд бодьгал билээ. Аливаа урлаг ч гэсэн хүрээнээсээ хальж, тэлэн, ил гарч, хүмүүнтэй адил харилцаан дунд орж, цаг хугацааны урсгалд холилдон, бусад бүтээлд нөлөөлж, бас нөлөөлөгдөж, хил хязгааргүй, эрх чөлөөтэй, эцэс төгсгөлгүй төсөөлөл дүүрэн ертөнцийг бий болгодог” гэжээ.
