Хөвсгөл нуурт нэр бүхий амралтын газар бохироо цутгаж байна гэх тайлбартай зураг олон нийтийн сүлжээнд цацагдсан. Уг мэдээллийн дагуу холбогдох байгууллагууд ажиллан, уулын үер бууж нуур руу орж байгааг тогтоосон байна. Мөн булингар бохирдлыг тодорхойлж, нуурын уснаас дээж аван шинжлэхэд бохирдол илрээгүй гэх дүгнэлт гарчээ. Энэ талаар Байгаль орчин, аялал жуулчлалын яам албан ёсны цахим хуудсаараа мэдээлсэн байна.
Тодруулбал, Хөвсгөл нуурын эрэгт үйл ажиллагаа явуулдаг нэр бүхий амралтын газар нуурын ус руу бохироо цутгаж байна гэх тайлбартай зураг олон нийтийн сүлжээнд анх цацагдсан. Уг мэдээллийн дагуу Хөвсгөлийн Улсын тусгай хамгаалалтын газрын хамгаалалтын захиргаа, Хөвсгөл нуур, Эгийн голын сав газрын захиргаа, Экологийн асуудал хариуцсан байцаагч, Хөвсгөл аймгийн онцгой байдлын газар, Хөвсгөл УЦУОШТ-ийн байгууллагуудын бүрэлдэхүүнтэй ажлын хэсэг газар дээр нь ажиллан уулын үер бууж, нуур руу орж байгааг тогтоосон юм байна.
