Сүхбаатар дүүргийн нутаг долоодугаар хорооны нутаг дэвсгэрт Үндэсний номын сангийн өргөтгөл, шинэ барилга баригдаж буй. Гэтэл уг барилгаас 10 метр зайд, байгалийн гэрэл, нарыг хааж 16 давхар орон сууцны барилга баригдаж эхэлжээ. Анх барилгын ажил эхлэхдээ зөвшөөрөлгүй байсан энэ барилга сонгуулийн үеэр албан ёсны зөвшөөрлөө авсан байна. Ийнхүү уг орон сууцны барилга баригдах нь тодорхой болжээ. Барилгын норм, стандарт, дүрэм, журмыг зөрчсөн энэхүү орон сууцны барилгыг бариулахгүй байх талаар Үндэсний номын сангийнхан тэмцэж байгаа ажээ. Тэд номын сангийн олон улсын стандарт, мөрдөх дүрэм журамын баримтлахыг шаарсан эсэргүүцлээ холбогдох мэргэжлийн байгууллагуудад явуулж байсан ч ийнхүү хүчин мөхөсдлөө гэдгээ хэлж байна. Уг орон сууцны барилгын шав тавьсан газарт “Монголын нууц товчоо”-ны цэцэрлэгт хүрээлэн байгуулахаар төлөвлөж, төрийн шагналт зураач Ш.Тэнгисболдод захиалж бүтээлгэсэн “Монголын нууц товчоо”-ны хөшөөг босгохоор болоод байсан ажээ.
