Улсын хэмжээнд жилд дунджаар 500 орчим хүн ослын улмаас амь насаа алддаг гэсэн статистик бий. Зам тээврийн ослоор амиа алдсан хүмүүсийн 50 хувь нь анхны тусламж авч амждаггүйн улмаас нас бардаг гэсэн судалгаа байдаг. Тиймээс зам тээврийн осол хамгийн их гардаг хар цэгт анхны тусламжийн цэг байгуулах ажлыг хийж эхэлжээ. Тодруулбал, иргэдийн амь насыг авран хамгаалах зорилгоор Монголын Улаан загалмайн нийгэмлэг, Зам тээврийн хөгжлийн яам, Замын хөдөлгөөний аюулгүй байдлыг хангах үндэсний зөвлөлийн ажлын алба, Тээврийн цагдаагийн алба, Онцгой байдлын байгууллага, Монголын авто холбоо хамтран улсын хэмжээнд хамгийн их зам тээврийн осол гардаг авто замууд дагуу анхны тусламжийн цэгийг байгуулахаар болсон байна. Эхний ээлжинд Улаанбаатараас Өмнөговь явах авто замын дагуу ийм цэг байгуулж, осол өртсөн иргэдэд тусламж үзүүлэх мэдлэг олгох сургалтыг зохион байгуулж байгаа юм байна.
