Ираны эсрэг цэргийн ажиллагаа явуулахад эхний зургаан өдрийн туршид 11,3 тэрбум доллар зарцуулсан гэж Вашингтоны захиргаа Конгресст мэдээлжээ.
The New York Times сонинд мэдээлэл өгсөн эх сурвалжуудын өгүүлснээр, 03 дугаар сарын 10-ны өдөр хаалттай болсон хуралдааны үеэр Пентагоны төлөөлөгчид хууль тогтоогчдод мэдээлэл өгөхдөө Ираны эсрэг цэргийн ажиллагааны зардал эхний зургаан өдрийн туршид 11,3 тэрбум доллар давсан хэмээсэн байна. Энэ нь анхны цохилтоос өмнө цэргийн техник, бие бүрэлдэхүүнийг байрлуулах зэрэг бусад зардал багтаагүй дүн аж. Зардлуудыг нарийвчлан тооцох ажил үргэлжилж байгаа тул эцсийн дүнгээр ажиллагааны өртөг өндөр тусаж болзошгүй гэж эх сурвалж онцолжээ.
Ираны эсрэг АНУ, Израилын хамтарсан цэргийн ажиллагаа 02 дугаар сарын 28-ны өдөр эхэлсэн. Иран улсын зүгээс пуужин болон цөмийн заналхийлэл ирж байгаа тул энэ ажиллагааг эхлүүлсэн гэж АНУ мэдэгдэж байлаа. АНУ, Израил хамтарсан цохилт өгсний хариуд Ираны Исламын хувьсгалын харуулуудын корпус хариу цохилт өгөхдөө Бахрейн, Иордан, Катар, АНЭУ, Кувейт, Саудын Араб дахь Америкийн цэргийн баазуудыг онилж байв.
Эх сурвалж: The New York Times, ВВС
