БНХАУ-ын Бээжин хотноо энэ сарын 15-19-нд “Робот чаллэнж” (Robot Challenge) олон улсын роботын тэмцээн болжээ. Уг тэмцээнээс Монголын баг тамирчид 6 алт, 7 мөнгө, 5 хүрэл медаль авч, амжилттай оролцсон байна.
Тэмцээнд Монголын робот хөгжүүлэлтийн холбоо, “Шинэ эрин”, “Монгол тэмүүлэл”, Улаанбаатар хотын 44 дүгээр сургууль, “Орхон Эмпати”, Өмнөговь аймгийн Ханбогд сумын хоёрдугаар сургууль зэрэг байгууллагын 100 гаруй хүний бүрэлдэхүүнтэй баг тамирчид ийнхүү оролцож, нийт 18 медаль хүртжээ.
Энэ удаагийн “Робот чаллэнж” тэмцээнд 42 орны 5000 гаруй тамирчин өрсөлдсөн байна. Манай улсын баг тамирчид 2018 оноос хойш 5 дахь удаагаа оролцож байгаа бөгөөд “Robot Rugby” төрөлд 4 дэх удаагаа түрүүлж, амжилтаа баталсан юм.
