Баасан, бямба, ням гаргуудад монголчуудын архины хэрэглээ эрс нэмэгддэг. Энэ нь ажлын стресс, ядаргаагаа тайлж, найз нөхөдтэйгөө наргиж цэнгэх, сэтгэлээ нээх, асуудлаа түр мартах гэх мэт шалтгаан, тайлбартай байх нь түгээмэл. Тэгвэл энэ нь архины хэт хэрэглээ, хамаарал руу түлхдэг болохыг мэргэжлийн эмч нар анхааруулж байна. Архи ууж стрессээ тайлна гэдэг бол хамгийн буруу. Иймэрхүү шалтгаанаар архи уухаас татгалзаж сурах хэрэгтэй ажээ.
Монгол Улсын Ерөнхийлөгчийн санаачлан хэрэгжүүлж буй “Эрүүл монгол хүн” хөтөлбөрийн хүрээнд “Амсахгүй бол Харамсахгүй” аян орон даяар хэрэгжиж байгаа билээ. Аяны хүрээнд донтох эмгэг судлалын мэргэжилтнүүдийн зөвлөгөө, ярилцлагыг цувралаар хүргэж байна.
