Дэлхий нийтийг хамарсан цар тахлын үед Олон улсын валютын сангаас гишүүн улс орнууддаа үзүүлж буй санхүүжилттэй холбоотойгоор манай улсад хэрэгжүүлж буй Өргөтгөсөн санхүүжилтийн хөтөлбөрийг өөрчлөх шийдэлд хүрсэн. Ийнхүү түргэвчилсэн санхүүжилтийн хөтөлбөр хэрэгжиж эхлэх бөгөөд манай улсад 99 сая ам.долларын санхүүжилт орж ирнэ гэж Монголбанкны мөнгөний бодлогын газрын захирал Б.Баярдаваа өнгөрсөн сард мэдээлж байв.
Тэгвэл энэ санхүүжилт Монгол Улсын дансанд орсон талаар Сангийн сайд Ч.Хүрэлбаатар, Засгийн газрын ХМХХ-ийн дарга Ц.Ганзориг нар твиттэр хуудсандаа мэдээлжээ. Тухайлбал, Засгийн газрын ХМХХ-ийн дарга Ц.Ганзориг,
“ОУВС-ийн захирал Кристалина Георгиева “Монгол Улс Covid-19-өөс хамгаалах чиглэлд шуурхай арга хэмжээ авсан нь олон хүний амь насыг эрсдэлд оруулахаас хамгаалсан. ОУВС-гаас олгож буй 99 сая долларын санхүүжилт нь дээрх арга хэмжээнүүдээ үргэлжлүүлж, эдийн засгаа тэтгэхэд тус нэмэр болно” хэмээн мэдээлснийг фэйсбүүк хуудастаа хуваалцжээ.
