Засгийн газар, Улсын онцгой комиссын шийдвэрийн дагуу иргэдээ авчрахаар Австрали ниссэн Сидней-Улаанбаатар чиглэлийн тусгай үүргийн онгоцыг хүлээж авахад бэлэн болжээ. Нэг талдаа 10 мянга 100 орчим км зам туулах “МИАТ” компанийн нисэх багийн бүрэлдэхүүнийг Ж.Доржнамжил ахалж байна. Энэ удаагийн нислэг Австрали тив рүү хийсэн анхны шууд нислэг гэдгээрээ манай улсын иргэний агаарын тээврийн салбар болон хоёр улсын харилцаа, хамтын ажиллагааны түүхэнд бичигдэн үлдэх нь.
Улсын онцгой комиссын Шуурхай штаб, штабын бүрэлдэхүүнд багтсан нэр бүхий яам, агентлаг, байгууллагын ажилтнууд болон иргэдийг угтаж авах эрүүл мэнд, онцгой, мэргэжлийн хяналт, нисэх, хил, гааль, цагдаа, тусгаарлах байранд хүргэх автобус компани, жолооч, тусгаарлах байрны хамт олон зэрэг бүх бэлтгэлээ бүрэн хангасан байна. Австралиас ирсэн иргэдийг ХӨСҮТ, Цэргийн төв эмнэлэг, “Амар”, “Баянбайгаль”, “Баянхангай” буудал, сувилалд тусгаарлах юм байна.
Иргэд маань тусгаарлах байранд байхдаа эрүүл ахуй, халдвар хамгааллын дүрмээ сайн мөрдөж, эмч, мэргэжлийн байгууллагын хүмүүсийн заавар, зөвлөмжийг дагах нь л чухал гэдгийг мэргэжлийн байгууллагууд анхааруулж байна.
