Сүхбаатар дүүргийн 10-р хорооны иргэн Н.Батзориг санаачлан “Сэлбэ голоо аварцгаая” аяныг эхлүүлжээ. Тэрбээр энэхүү аяныхаа тухай “Эрүүл мэндээ хамгаалах, үр хүүхдээ өсгөн хүмүүжүүлэх, байгаль орчноо хамгаалах нь Үндсэн хуулиар олгогдсон иргэн бүрийн журамт үүрэг. Тиймээс энэхүү журамт үүргээ биелүүлж, нийслэл Улаанбаатар хотын дундуур урсдаг Сэлбэ голоо аварч, хамгаалах аяныг санаачлан эхлүүлээд байна. Сэлбэ голын урсацыг сайжруулах, орчныг тохижуулах төслийг 2011 онд нийслэлийн Засаг даргын Тамгын газар, Сүхбаатар дүүргийн Засаг даргын Тамгын газар хамтран эхлүүлсэн ч бүрэн дуусаагүй. Өнөөг болтол Сэлбэ голын урсац сайжраагүй бөгөөд орчны тохижилт нь хагас дутуу хийгдсэн. Тиймээс уг төслийг дахин эхлүүлж бодит ажил болгохын тулд “Сэлбэ голоо аварцгаая” аяныг санаачлан эхлүүлээд байна” хэмээн ярилаа.
“Сэлбэ голоо аварцгаач” аян 2020 оны дөрөвдүгээр сарын 20-нд эхэлсэн бөгөөд аравдугаар сарын 01 хүртэл үргэлжлэх юм байна. Аяны хүрээнд иргэд “Сэлбэ голын тохижилт” пэйж хуудсанд нэгдэж, санал бодлоо илэрхийлэх, бусдыгаа уриалах, Сэлбэ голын урсацыг сайжруулах, орчныг нь тохижуулах асуудлаар шийдэл, гаргалгаа гаргах, төр захиргааны байгууллагуудад хандан хамтран ажиллах, байгалиа хамгаалах эерэг зөв хандлагыг төлөвшүүлэх зэрэг нөлөөллийн ажлууд хийх ажээ. Аяны үр дүнд Улаанбаатар хотын дундуур урсдаг Сэлбэ голын урсацыг сайжруулж, орчны тохижилтыг хийснээр хотын ард иргэдийн эрүүл, зөв боловсон амьдрах орчин бүрдэнэ гэж тооцоолж байгаа юм байна.
Уг аяныг дэмжиж, 3000 гаруй иргэн Сэлбэ голыг хамгаалах асуудлаар өөрийн үзэл бодлоо илэрхийлжээ. Мөн Сүхбаатар, Баянзүрх дүүргийн 1000 гаруй иргэн цаасан хэлбэрээр гарын үсэг зурж дэмжлэг үзүүлэн оролцож байгаа ажээ.
