2020 оны дөрөвдүгээр сарын 30-ны өдөр Сөүл-Улаанбаатарын тусгай үүргийн онгоцоор ирсэн 281 зорчигчид коронавирусийн шинжилгээ хийжээ. Үүнээс нэг иргэнээс коронавирусийн халдвар илэрч, 39 дэх тохиолдол бүртгэгджээ. Нийт дөрвөн лабораториор дээрх шинжилгээг хийжээ.
ХӨСҮТ-д тусгаарлагдсан 25 хүний давтан шинжилгээ, Дорноговь аймагт тусгаарлагдсан 6 хүний шинжилгээ, Баян-Өлгий аймагт тусгаарлагдсан 2 хүний шинжилгээ, тандалтын журмаар цуглуулсан 26 сорьцонд шинжилгээ хийжээ. Эдгээр сорьцонд коронавирус илрээгүй байна. Алтанбулагийн боомтоор орж ирсэн 25 жолоочийн шинжилгээнд коронавирус мөн илрээгүй байна.
Франкфуртын онгоцоор явах гэж байгаа нэг хүнээс коронавирус илэрлээ гэсэн мэдээлэл гарсан. Энэ нь ташаа болохыг ХӨСҮТ-ийн захирал Д.Нямхүү мэдээллээ. Энэ талаар тэрбээр Франкфурт явах гэж байгаа хэд хэдэн хүнд шинжилгээ хийхэд нэг эмэгтэйд коронавирусийн эсрэг бие үүссэн байсан. Энэ нь тухайн хүний биед коронавирусийн халдвар орж хөнгөн маягаар өвчлүүлээд, эдгэрсэн хойно нь эсрэг бие үүссэн байдаг. Өөрөөр хэлбэл вирус тухайн хүний биед тэмдэг тавьсан гэсэн үг. Үүнийг коронавирус илэрчихлээ гэж ташаа мэдээлэл цацсан нь буруу. Эсрэг биет үүссэн гээд бид орхихгүй, ойр хавийнх нь хүмүүст хяналт тавьж, коронавирусийн шинжилгээ хийхэд илрээгүй. Энэ хүн Бельги улсаас ирсэн. Гэхдээ коронавирус илрээгүй. Хуурамч, ташаа мэдээлэл тараах нь маш буруу, маш хортой юм гэлээ.
Франц иргэн бүрэн эдгэрээд өнөөдөр өглөө буцжээ. Түүнийг Д.Нямхүү эмч өөрийн биеэр гаргаж өгчээ. Тэрбээр ХӨСҮТ-ийн бүх эмч нар, баг хамт олонд болон монголчуудад баярлаж талархсанаа илэрхийлжээ.
