Монгол улсын Шинжлэх ухааны Академи шинжлэх ухааныг сурталчлах, түгээн дэлгэрүүлэх зорилгоор ерөнхий боловсролын сургуулийн сурагчид, хүүхэд залуучууд, олон нийтэд зориулсан шинжлэх ухааны хялбаршуулсан цуврал номыг 2015 оноос эхлэн хэвлүүлж, нийтийн хүртээл болгож байна. Шинжлэх ухаан танин мэдэхүйн хялбаршуулсан цуврал номын шинэ дугааруудыг өнөөдөр Нийслэлийн боловсролын газарт хүлээлгэн өглөө. Тус цуврал бүтээл нь шинжлэх ухааны олон салбар, чиглэлийн мэдлэгийг энгийн ойлгомжтой хэлбэрээр хялбаршуулан бичсэнээрээ онцлог бөгөөд хүүхэд, багачуудад шинжлэх ухааны мэдлэг олгох, цаашлаад шинжлэх ухаанч иргэн болгон төлөвшүүлэхэд ихээхэн ач холбогдолтой юм.
Ном хүлээлгэн өгөх ажиллагааны үеэр ШУА-ийн ерөнхийлөгч Д.Рэгдэл “Шинжлэх ухааны байгууллагын үндсэн үүрэг нь нийгмийг соён гэгээрүүлэх ажил байдаг. Энэхүү өргөн асуудлын хүрээнд бид залуу хойч үедээ зориулаад орчин үеийн шинжлэх ухааныг сонирхолтой хэлбэрээр бичсэн жижиг товхимлыг ШУА 6 дахь жилдээ хэвлэн гаргаж байна. Энэхүү номоо бид Нийслэлийн боловсролын газраар дамжуулан хүүхэд багачуудын гар дээр хүргэдэг уламжлалтай. Энэ уламжлалаараа өнөөдөр 10 цуврал 300 багц номыг та бүхэндээ гардуулж өгч байна” гэлээ.
ШУА-ийн эрдэмтдийн энэ онд гаргаж буй цуврал нь “Хиймэл оюун ухаан”, “Гурван хэмжээст хэвлэл”, “Таван хошуу малын мах”, “Монгол тарвага”, “Шингэн алт үйлдвэрлэгч шидтэн”, “Чихрийн тухай ойлголт”, “Тэгш хэмийн гайхамшиг”, “Усны эрчим хүч”, “Агаар мандал”, “Удамшил” зэрэг сэдвээр бичигджээ. 2015 оноос хойш тогтмол хэвлэгдэж буй энэхүү хялбаршуулсан номын тоо өнөөдөр ийнхүү 54 болж баяжигдаж нийтийн хүртээл болж байна.
