АНУ-ын Засгийн газраас тус улсын Олон улсын хөгжлийн агентлагаар дамжуулан Монгол Улсын Засгийн газарт COVID-19 халдварын эсрэг тэмцэхэд нь зориулж 3.3 тэрбум гаруй төгрөг буюу 1.2 сая ам. долларын дэмжлэг үзүүлэхээр болжээ. Энэ тусламжийн хүрээнд Эрүүл мэндийн яамнаас иргэд, олон нийтийн бэлэн байдлыг хангах тогтолцоог бэхжүүлэх, нэн хэрэгцээтэй хэрэгсэл, материалыг нийлүүлэх, ус, эрүүл ахуй, ариун цэврийн үйлчилгээг сайжруулах, тоон мэдээлэл ашиглан дүн шинжилгээ хийх чадавхийг дээшлүүлэх ажлуудыг хийх юм байна. Эмнэлгийн үйлчилгээ үзүүлэгчид болон өвчтөнийг хамгаалах, лабораторийн шинжилгээний чадавхийг нэмэгдүүлэх, тархвар зүйн хяналт тогтоох болон өвчтөнд эмнэлгийн чанартай үйлчилгээ үзүүлэхэд Олон улсын хөгжлийн агентлагийн хөтөлбөрүүд ЭМЯ-нд мөн дэмжлэг болох ажээ. “АНУ Монгол Улсын стратегийн түнш бөгөөд өнөөдрийн энэ тусламж үүний тод илрэл юм” хэмээн АНУ-аас Монгол Улсад суугаа Элчин сайд Майкл Клечески хэлжээ.
