“Ногоонбаатар” олон улсын наадам Улаанбаатарт болно

Олон улсын Эко урлагийн наадам Монгол Улсад анх удаа “Ногоонбаатар” нэрээр зохион байгуулагдах гэж байна. Ирэх дөрөвдүгээр сард болох энэ арга хэмжээг Европын холбооны Соёлын институтийн нэгдлээс санхүүжүүлж, Европын холбооноос Монгол Улсад суугаа Төлөөлөгчийн газар, БНЧУ-ын Элчин сайдын яам, Улаанбаатар хот дахь Франц хэл, соёлын “Аллианс Франсэз” төв, Монгол дахь ХБНГУ-ын соёлын Гёте-Институт, Монголын Урлагийн Зөвлөл болон Соёл Урлагийн Их Сургууль тус тус хамтран зохион байгуулах юм байна.

Тус наадмын хүрээнд монгол, герман, франц, чех уран бүтээлчид 6 долоо хоногийн туршид хамтран ажиллах ба Улаанбаатар хотын гэр хорооллын оршин суугчидтай агаарын бохирдлын талаар ярилцаж, олон нийтийг урлагаар дамжуулан хандлагыг өөрчлөх, тэдний амьдралын хэв маягийг байгаль орчинд ээлтэй болгон төлөвшүүлэхэд чиглэн ажиллах зорилготой ажээ.
Энэхүү эко урлагийн наадамд Монголоос есөн уран бүтээлчийг шалгаруулах юм. Шалгарсан дотоод, гадаадын уран бүтээлчид хамтран гэр хорооллын олон нийтийн байгууллага, иргэд, агаар, орчны бохирдлын мэргэжилтнүүдтэй зөвлөлдөж бүтээлийн санаагаа боловсруулан олон нийтийн (public art) болон гудамжны урлаг (street art) хэлбэрээр бүтээлээ туурвих аж.