Майк Помпео Казахстаныг Хятадаас болгоомжлохыг уриалжээ

АНУ-ын Төрийн нарийн бичгийн дарга Майк Помпео бямба гаригт Казахстан хүрэлцэн очиж, албан ёсны айлчлалаа эхлүүлжээ. Тэрбээр Казахстан улсын ерөнхийлөгч Кассим-Жомарт Токаев, тус улсын анхны ерөнхийлөгч Нурсултан Назарбаев нартай уулзсан байна. Тэд хоёр орны харилцааг гүнзгийрүүлж, эдийн засаг, худалдаа, бүс нутаг, аюулгүй байдлын хамтын ажиллагааг өргөжүүлэх талаар санал бодлоо солилцсон байна. Энэ үеэр Майк Помпео “Хятадын хөрөнгө оруулалт, нөлөөнөөс болгоомжлохыг уриалж, Төв Азийн улс орнууд болон бусад бүс нутгийн улс орнуудыг БНХАУ дахь үндэстний цөөнхийн хэлмэгдүүлэлтийг зогсоохыг шаардсан уриалгад нэгдэхийг хүсчээ.
Майк Помпео “БНХАУ-ын хөрөнгө оруулалтын анхаарал татахуйц байдал нь аливаа улс орны тусгаар тогтнолд ихээхэн сорилт дагуулах бөгөөд тухайн улсын урт хугацааны хөгжилд сөргөөр нөлөөлж болзошгүй” гэсэн байна. Мөн тэрбээр “Бид Казахстан улс аль улс орнуудтай харилцаагаа өргөжүүлж, худалдаа, бизнесийн салбар хамтрахаа сонгох эрх чөлөөг хүндэтгэж байгаа. Гэхдээ АНУ-ын компаниудтай хамтрахад улс орнууд хамгийн сайн үр дүнд хүрнэ гэдэгт би итгэлтэй байна” гэж нэмж хэлжээ.
АНУ-ын төрийн нарийн бичгийн дарга өчигдөр буюу ням гаригийн орой Узбекистанд хүрэлцэн очжээ. Тэрбээр очсон даруйдаа тус улсын шашны тэргүүнүүдтэй уулзаж шашны эрх чөлөөний талаар ярилцсан байна. Харин өнөөдөр Узбекистаны албаны хүмүүстэй уулзаж, Төв Азийн таван орны гадаад хэргийн сайд нартай аюулгүй байдлын асуудлаарх яриа хэлэлцээрт оролцож байгаа ажээ.