Ус цаг уур, орчны судалгаа, мэдээллийн хүрээлэнгийн Хөдөө аж ахуйн цаг уурын судалгааны хэлтсээс гаргасан хөдөө аж ахуйн 10 хоногийн цаг уурын тоймыг хүргэж байна. Тоймд дурдсанаар, бэлчээрийн ургамлын ургалт 6 дугаар сарын 20-ны байдлаар нийт нутгийн 50 орчим хувьд сайн, 40 орчим хувьд дунд, 10 гаруй хувьд муу байна. Үүнд:
Баянхонгор, Өвөрхангай, Дундговь, Баян-Өлгийн зарим, Ховд, Завхан, Говь-Алтай, Төв, Өмнөговийн цөөн сумдын нутгаар муу, Дорнод, Орхон, Дархан-Уул, Говьсүмбэрийн нийт, Увс, Завхан, Хөвсгөл, Сэлэнгэ, Төв, Нийслэл, Хэнтий, Сүхбаатар, Дорноговийн ихэнх, Булган, Говь-Алтай, Баян-Өлгийн зарим, Ховд, Архангай, Өвөрхангай, Дундговь, Өмнөговийн цөөн сумдын нутгаар сайн, бусад нутгаар дунд зэрэг байна.
МАА-н үйлдвэрлэлд цагаан идээ боловсруулах, хонины ноос хяргах, мал хөнгөлөх, бод мал төллүүлэх ажил явагдаж байна. Харин газар тариалангийн үйлдвэрлэлд Хөвсгөл, Архангай, Өвөрхангай, Төв, Сэлэнгэ, Дархан-Уул, Дорнод, Увс аймгуудаар усалгаа хийх, зэрлэг зулгаах, хор цацах ажлууд хийгдэж байна.
Цаг агаарын нөхцөлийн онцлог
- Өнгөрсөн арав хоногт агаарын температур төв, зүүн болон говийн аймгуудын ихэнх нутгаар дунджаас 4.4…1.1 градусаар хүйтэн, Ховд, Говь-Алтайн ихэнх хэсгээр дунджаас 1.1…3.8 градусаар дулаан, бусад нутгаар дунджийн орчим байв. Хур тунадасны хувьд төвийн аймгуудын нийт, зүүн болон говийн аймгуудын ихэнх, баруун аймгуудын цөөн сумдын нутгаар дунджаас ахиу, баруун аймгуудын ихэнх, Баянхонгор, Өмнөговь, Дорноговь, Сүхбаатарын зарим нутгаар олон жилийн дунджийн орчим бусад нутгаар дунджаас бага хур тунадас орсон байна. Сэлэнгийн Ерөөд хамгийн их буюу 73 мм хур тунадас орсон байна.
- Салхины хурд тал хээр болон говийн нутгаар 20-27 м/с буюу аюултай үзэгдлийн, Өмнөговийн Цогт-Овоо, Дундговийн Сайнцагаан, Луус, Гурвансайханд 28 м/с буюу онц аюултай үзэгдлийн хэмжээнд хүрч салхилсан байна.
- Арав хоногийн сүүлийн хагаст Хөвсгөл, Өвөрхангай, Архангай, Булган, Сэлэнгэ, Улаанбаатар, Төв, Хэнтий аймгуудын нутгаар нойтон цас орсон байна.
