“Эрдэнэс Монгол” ХХК-ийн Төлөөлөн Удирдах Зөвлөлийн хурал өнөөдөр болж, Гүйцэтгэх захирал Б.Даваадалай болон бусад удирдлага компанийн бүтцийн өөрчлөлт, шинэчлэлтэй холбоотой санал, шинэчилсэн дүрмийн төслийг танилцууллаа.
Монгол Улсын Засгийн газар “Эрдэнэс Монгол” нэгдлийг уул уурхайн урсгал үйлдвэрлэл, үйл ажиллагаа удирддаг өнөөгийн бүтцээс чөлөөлж, хөрөнгийн удирдлага, баялгийн сангийн менежмент, IPO, хувьчлал хариуцсан мэргэжлийн холдинг компани болгон өөрчлөх шийдвэр гаргасан. Компанийн үйл ажиллагааны чиглэлийг шинэчлэн боловсруулахдаа Сантьяго зарчим, OECD-Төрийн өмчит компанийн засаглалын зөвлөмж, “Темасек”, “Самрук Казына” зэрэг олон улсад сайн жишиг болсон сангуудын засаглалын кодекст нийцүүлжээ.
Бүтцийн өөрчлөлт, шинэчлэлийн хүрээнд үр ашиггүй компаниудыг татан буулгах, нэгтгэх, орон тоог оновчлох зэрэг ажлууд хийгдэх юм. Гүйцэтгэх удирдлагын багийн боловсруулсан бүтцийн болон дүрмийн өөрчлөлтийн төслийг ТУЗ-ийн гишүүд хэлэлцээд, сайжруулсан саналуудыг тусгаж, Засгийн газрын хуралдаанаар хэлэлцүүлэхээр тогтлоо.
