Японы түрэмгийлэгчдээс Хятад, Өвөрмонголын ард түмнийг чөлөөлөх зорилгоор Монгол, Зөвлөлтийн армийн хамтарсан хүчээр явуулсан дайны ялалтын 80 жилийн ой энэ онд тохиож байна. Чөлөөлөх дайны 80 жилийн ойд зориулж БНХАУ-ын уран бүтээлчид “Баатар Аюуш” баримтат кино бүтээжээ. Уг кинонд Монгол, Хятадын судлаачид, эрдэмтэд, цэргийн түүхчид оролцжээ.
Лувсанцэрэнгийн Аюуш бол 1945 оны чөлөөлөх дайнд оролцож, Жанчхүүгийн давааны байлдаанд эрэлхэгээр байлдаж амь үрэгдсэн бөгөөд БНМАУ-ын баатар цолыг нэхэн олгосон юм. Японы түрэмгийллийн эсрэг Хятадын ард түмний дайн болон дэлхийн фашизмын эсрэг дайны ялалтын 80 жилийн ойг тохиолдуулан, энэхүү баримтат киногоор, түүхэн ой санамжийг сэргээж, Лувсанцэрэнгийн Аюушийн намтар түүх, гавьяа зүтгэл, эргэн дурсагдаж буй байдал хийгээд дэлхийн хоёрдугаар дайны төгсгөл болон Монгол Улс, БНХАУ хоёр орны найрамдалт харилцааг товч тодорхой өгүүлсэн байна.
