Үндсэн хуулийн цэц маргааш их суудлын хуралдаанаараа Засгийн газрыг огцруулсан УИХ-ын тогтоол Үндсэн хууль зөрчсөн эсэхийг хэлэлцэнэ. Энэ бол Цэцийн онцгой, бүрэн эрх юм. Гэтэл Цэцийн шийдвэр гараагүй байхад тааж мэдээд урьдчилан эсэргүүцээд уналаа. Цэц нөлөөнд автах нь, томилуулсан хүнийхээ эсрэг шийдвэр гаргахгүй байх гэх мэтээр ярьж, бичиж байна. Энэ таамаглал, төсөөлөлдөө олон нийтийг итгүүлэх гэж хичээж ч байх шиг. Улс төрийн талцал, маргаанаа Цэц рүү чирээд оруулаад ирлээ. Маргаж мэтгэлцэж байгаа талуудын пиарчид нь ажлаа хэт сайн хийгээд, Үндсэн хуулийн цэцийг ээлжит байгаараа сонгон онилж, сумаа тавьж эхэлжээ.
Энэ бол хэрээс хэтэрсэн үйлдэл. Хууль тогтоогчид Үндсэн хуулийнхаа дээгүүр алхсан эсэхийг тогтоох гэж байхад нь хэн ч Цэцийн шийдвэрт нөлөөлөх гэж оролдох ёсгүй. Байгууллага, иргэд Цэцэд хүсэлт, мэдээлэл гаргаж байгааг, түүнийг нь хэлэлцэх гэж байгааг буруутгаж бас болохгүй. Ер нь Үндсэн хуульдаа, Үндсэн хуулийн шүүх буюу Цэцийн шийдвэрт хүндэтгэлтэй хандах учиртай. Улстөржлөө улстөржлөө гээд улсаа нурааж болохгүй. Энэ бол сууж байгаа мөчрөө хөрөөдсөнтэй адил хэрэг. Талцаж хагарлаа гэхэд төрөө ганхуулах ёсгүй. Үндсэн хуулийн дээр гарсан эрх мэдэл, ашиг сонирхол, улс төр гэж байж болохгүй.
