“Эрдэнэс Монгол” нэгдлийн удирдах ажилтны зөвлөгөөн Эрдэнэт хотод болж байна. Тус зөвлөгөөнд Засгийн газрын Хэрэг эрхлэх газрын холбогдох албан тушаалтнууд оролцож, нэгдлийн үйл ажиллагаа, бүтцийн өөрчлөлт хийснээр гарч буй үр дүн зэрэгтэй танилцаж байгаа юм. Засгийн газраас төрийн өмчит компаниудын менежментийг сайжруулах бодлогын хүрээнд төрийн өмчит уул уурхайн 30 компанийг нэгтгэн “Эрдэнэс Монгол” нэгдлийг байгуулсан юм. Ийнхүү уул уурхайн компаниудыг нэгдсэн удирдлагаар хангаснаар менежментийг нь сайжруулж, алдагдлыг бууруулан, ашигт ажиллагааг нэмэгдүүлнэ гэж үзсэн юм.
Бүтцийн өөрчлөлт хийснээр “Эрдэнэс Монгол” нэгдэл хагас жилийн хугацаанд нийт өрийн хэмжээг 500 тэрбум төгрөгөөр бууруулж чадсан байна. “Эрдэнэс Монгол” ХХК-ийн гүйцэтгэх захирал С.Наранцогтын мэдээлснээр төрийн өмчит уул уурхайн компаниудын нийт өр 7.8 их наяд төгрөг болж буурчээ. Ерөнхий дүнгээр “Эрдэнэс Монгол” нэгдлийн эргэлтийн хөрөнгө 1.6 их наядаар нэмэгдсэн бол борлуулалтын орлого 6.9 их наядаар өссөн үзүүлэлттэй гарсан байна. Нэгдлийн нийт хөрөнгийн 60 хувийг “Эрдэнэс Тавантолгой” ХК, 20 хувийг “Эрдэнэт үйлдвэр” ТӨҮГ бүрдүүлдэг юм. Засгийн газраас хэрэгжүүлж буй төрийн өмчит компаниудыг татан буулгахаас гадна чиг үүрэг ижил компаниудыг нэгтгэх болон хувьчлах зэрэг ажил ид үргэлжилж байгаа. Өнөөдрийн байдлаар долоон компани, 13 ТУЗ-ийг татан буулгасан. Дээрх бодлогын хүрээнд зардал буурч, ашигт ажиллагаа нэмэгдэх боломж бүрдсэн байна.
“Эрдэнэс Монгол” нэгдлийн уул уурхайн компаниуд олборлолтоо нэмэгдүүлэх, чадварлаг бөгөөд цомхон бүтцээр бүтээмжтэй ажиллах зорилго тавьсан нь ийн биелж эхэлжээ. Тус нэгдлийн үйл ажиллагааны хагас жилийн тайлангаар “Эрдэнэт үйлдвэр” ТӨҮГ 93 хувийн үнэлгээ авч тэргүүлсэн байна. Тус компанийн хувьд нийт зардлаа бууруулж чадсаны зэрэгцээ нөөцийн хэмжээг нэмэгдүүлэхээр ажиллаж байгаа аж. Харин “Дархан төмөрлөгийн үйлдвэр” 67, “Цемент шохойн үйлдвэр” 80 хувийн үнэлгээ авч удаалжээ.
2022 оны эцсийн байдлаар “Эрдэнэс Монгол” нэгдлийн хуримтлагдсан өр төлбөр 8.4 их наяд төгрөгт хүрээд байсан. Энэ өрийн дийлэнх хувь “Эрдэнэс Тавантолгой” ХК дээр буюу нүүрсээ урьдчилан борлуулж томоохон төсөл хөтөлбөрүүдийг санхүүжүүлсэнтэй холбоотой асуудал байв. Энэ өр төлбөрийг өндөр хэмжээнд бууруулж чадсан байна. Тухайлбал, “Эрдэнэс Тавантолгой” компанийнхан хагас жилийн байдлаар өөрийн өр төлбөрийг өнгөрсөн жилийнхээс 50 хувиар бууруулжээ. Ингэснээр нийт хуримтлагдсан өр төлбөрөө 800 тэрбумаар бууруулсан дүн мэдээтэй байна. Цаашид энэ хурдаараа ажиллаж чадвал өр төлбөрөө барагдуулахын зэрэгцээ цэвэр ашиг, орлогоо нэмэгдүүлэх бүрэн боломжтой.
“Эрдэнэт үйлдвэр”-ийн хувьд ч өнөөдрийн байдлаар нийт өр төлбөрөө 300 гаруй тэрбумаар бууруулаад байгаа аж. Нэгдлийн хэмжээнд нийтдээ 500 гаруй тэрбумаар өр төлбөрөө бууруулсан үзүүлэлттэйгээр хагас жилийн тайлангаа дүгнэж байгаа аж. “Эрдэнэс Монгол” нэгдлийн ТУЗ-ийн дарга Ш.Мөнхцэрэн “Эрдэнэс Монгол” нэгдэлд нэгдсэн нийт 40 компани бий. Эдгээр нь охин болон охины охин, хараат, төслийн нэгж компани гэсэн бүтэцтэй явдаг. Компанийн засаглал сайжруулахаас гадна олон жил үр ашиггүй ажилласан, үйл ажиллагаа нь зогссон компаниудыг хувьцаа эзэмшигч буюу Монгол Улсын Засгийн газраас цөөлөх чиглэлийг өгсөн. Үүний дагуу компаниудыг татан буулгахаас гадна хооронд нь нэгтгэх зэрэг үйл ажиллагааг эхлүүлээд явж байна. Компани татан буулгах процессыг мэдээж хуулийн дагуу явуулах учиртай. Үүний дагуу зарим компанид холбогдох процесс ид өрнөж байна. Одоогийн байдлаар долоон компанийг татан буулгасан. Хоёр компанийг нэг болгох буюу нэгтгэлээ. Мөн үүний зэрэгцээ ЗГХЭГ-ын дарга Д.Амарбаясгалангийн олон нийтэд зарласанчлан “Эрдэнэс Монгол” нэгдлийн харьяа компаниудын ТУЗ-ийг цөөлсөн гэлээ.
