Францын хамгийн том телевиз TF1 олон нийтийн сувгийн “The voice-2023” шоуны шалгаруулалтад монгол ардын язгуур урлагийн төрлөөр дагнан уран бүтээлээ туурвидаг Мишел Абрахам / Michel Abraham / оролцож байгаа аж. Энэ жилийн шоунд Францын 50 мянга гаруй хүн бүртгүүлэн оролцсоноос зуун авьяастныг шалгаруулан авч үлджээ. Мишель Абрахам 2011 оноос Монголын язгуур урлагийн “Urya” /Байгалийн дуудлага, уриа/ төслөө эхлүүлэн, хөөмэй, морин хуур, цуур, лимбэ зэрэг ЮНЕСКО-гийн соёлын өвд бүртгэгдсэн хөгжмийн зэмсгүүд болон орчин үеийн хөгжмийг хослуулан уран бүтээлээ туурвидаг байна. Энэ хугацаанд тэрбээр Франц болон бусад орнуудад Монголын нүүдэлчин түмний өвөрмөц ахуй соёл, урлагийг сурталчлан таниулсан байна.
