“Монгол уламжлал” академийн дэргэд Цогт тайж судлалын төв байгуулагдаж, анхдугаар хурлаа хийжээ. Хурлаар Цогт тайж судлалын төвийн зорилго, үйл ажиллагааны чиглэл, төлөвлөгөөг хэлэлцэн баталж, Цогт тайж судлалын өнөөгийн байдал, чиг хандлагын талаар мэдээлэл солилцсон байна. Хуралдаанд “Монгол уламжлал” академийн тэргүүн, Монгол Улсын Ардын багш, Соёлын гавьяат зүтгэлтэн, доктор, профессор Л.Дашням, “Гурван эрдэнэ” багшийн дээд сургуулийн захирал, Монгол Улсын гавьяат багш, доктор, профессор Ч.Жачин, Философийн хүрээлэнгийн захирал, доктор Д.Гантөмөр, Төмөр замын дээд сургуулийн багш, судлаач, доктор Д.Бүдсүрэн, “Монгол уламжлал” академийн судлаач, яруу найрагч Б.Бүргэд, яруу найрагч Г.Сонинбаяр нар оролцжээ.
“Монгол уламжлал” академийн дэргэдэх Цогт тайж судлалын төв нь Цогт тайжийн түүх, намтар судлалыг хөгжүүлэх, БНХАУ-ын Дээд Монгол буюу Хөхнуур мужид буй Цогт хунтайжийн түүх, намтартай холбоотой газар нутаг, түүх, соёл, аман зохиолын дурсгалыг тодруулах, хоёр улсын эрдэмтдийн хамтарсан судалгааны ажлын эхлэлийг тавих зэрэг олон талт ажлуудыг хийхээр төлөвлөжээ. Мөн Цогт тайжийн Монгол нутгаасаа Хөх нуурт очсон замаар түүхэн аялал жуулчлалын маршрут гаргах санал санаачилга ч гарсан байна.
