Монгол Улс, ОХУ-ын хооронд Соловьеск-Эрээнцав шалган нэвтрүүлэх боомтоор дамжин БНХАУ руу хил дамнасан төмөр замыг барих асуудлаар цахим уулзалтыг зохион байгуулжээ.
Уулзалтад ОХУ-аас Өвөрбайгалийн хязгаарын төлөвлөлт, хөгжлийн сайдын үүрэг гүйцэтгэгч Матвиев Станислав Владимирович тэргүүтэй 6 хүний бүрэлдэхүүнтэй төлөөлөгчид, Монголын талаас Дорнод аймгийн Засаг даргын Тамгын газрын Хөгжлийн бодлого, төлөвлөлт, хөрөнгө оруулалтын хэлтсийн дарга М.Нямсүрэн тэргүүтэй 5 хүний бүрэлдэхүүнтэй төлөөлөгчид оролцсон байна.
Монгол Улсын Их Хурлын 2021 оны 12 дугаар сарын 30-ны өдрийн 106 дугаар тогтоолоор баталсан “Шинэ сэргэлтийн бодлого”-ын хэрэгжилтийг хангах хүрээнд хилийн боомтуудын хатуу, зөөлөн дэд бүтцийг хөгжүүлэн ачаа болон зорчигч нэвтрүүлэх хүчин чадлыг дээшлүүлж, экспортыг нэмэгдүүлэхээр төлөвлөж, Ульхан, Эрээнцав боомтуудын хөгжлийн төлөвлөгөөг боловсруулж боомтуудыг үе шаттай хөгжүүлэх ажил өрнөж байна. Боомтын төмөр замын төсөл хэрэгжсэнээр хоёр улсын төдийгүй бүс нутаг хоорондын эдийн засгийн харилцаа өргөжин тэлэх, шинэ шатанд гарах боломж бий болох юм. Энэ хүрээнд Соловьеск-Эрээнцав шалган нэвтрүүлэх боомтоор дамжин хил дамнасан төмөр зам барих асуудлаар талууд санал солилцжээ.
