Шадар сайд С.Амарсайхан өчигдөр сэтгүүлчидтэй “Зангиагүй уулзалт” хийж, стандарт, хэмжил зүйн салбарыг шинэ шатанд гаргах ажлын төлөвлөгөө, судалгаа, мэдээллийн хүрээнд ярилцсан юм. Тэрбээр урьд өмнө Стандарт,хэмжил зүйн газарт удаа дараа очиж үүрэг даалгавар өгсөн. Хамгийн сүүлд Засгийн газрын хэрэг эрхлэх газрын дарга Д.Амарбаясгалангийн хамт очиж, урьд өмнө өгсөн үүрэг даалгаврын биелэлт тун хангалтгүй байгааг мэдээлж байсан.
Тэгвэл уг асуудал “Зангиагүй уулзалт”-ын үеэр ч хөндөгдөв. Тиймээс сэтгүүлчид Шадар сайдаас Стандарт, хэмжил зүйн газарт өгсөн үүрэг даалгаврын биелэлт хэр байгаа, тус газрын удирдлагуудад хариуцлага тооцох эсэх талаар тодруулахад “Үүрэг даалгаврын биелэлт үнэхээр хангалтгүй байгаа. Цаашид стандартыг сайжруулах чиглэлд шаардлагатай арга хэмжээ авна. Бүтэц, бүрэлдэхүүнд өөрчлөлт оруулж, удирдлагын багт хариуцлага тооцно” гэдгийг онцоллоо.
Өдгөө Стандарт, хэмжил зүйн газрын даргаар Б.Билгүүн гэх нөхөр ажилладаг бөгөөд анхнаасаа хууль бус томилогдсон, мэргэжлийн бус хүн гэдгийг энд дурдах учиртай. Аливаа улсад ус агаар мэт хэрэгтэй стандартын байгууллагыг мэргэжлийн бус хүн удирдана гэдэг хэрхэвч байж боломгүй асуудал гэдгийг ч салбарынхан ярьдаг. Тиймдээ ч энэ үеэр Шадар сайд “Монголд стандарт хангалттай байгаа ч хэрэгжихгүй байгаагийн гол шалтгаан нь стандартыг иргэд олон нийтэд таниулан сурталчилж мэдээлэл хүргэдэггүй, сургалт судалгаа явуулдаггүй, хэрэгжиж буй эсэхэд нь хяналт тавьдаггүй удирдлагын баг ажиллаж байгаатай холбоотой” гэдгийг давхар дуулгав.
Мөн үеэр эрүүл мэндийн салбарт асуудал бий. Тус салбарт 744 стандарт батлагдсан байна. Дээрх стандартуудыг ягштал дагаж мөрдөж чадвал салбарын өнгө төрх, үйлчилгээний чанар сайжраад явчихна. Тиймээс нэн түрүүнд хүний эрүүл мэнд, амьнас, аюулгүй байдлын асуудлаа чухлаас нь эхлээд аль болох зэрэг авч явах зарчмыг баримтална. Стандартыг бүгдээс шаардах хэрэгтэй байна. Тиймээс ч Засгийн газраас тухайн салбарын хэмжээнд томоохон шинэчлэл хийхээр зорьж байгаа гэдгийг ч дуулгаж байлаа.
