Ипотекийн зээл Монголд төдийгүй олон улсад хамгийн эрсдэл багатай зээлд тооцогддог. Учир нь иргэд урьдчилгаа 30 хувиа төлдөг, мөн орон сууцаа барьцаа болгодог учир хамгийн өндөр баталгаатай зээл юм. Гэтэл Монголын ипотекийн корпорац буюу МИК ипотекийн зээлийг зуучлан зээлдүүлэхдээ дундаас нь үйл ажиллагааны зардал гэж нэмснээр уг зээлийн хүү нэмэгдэж, тэр хэрээр иргэдэд ачаалал үүсэж байгаа юм. Түүнчлэн цар тахлын хоёр жилд иргэд, зээлдэгчид зээлийн төлөлтөө хойшлуулсан ч Нөөцийн сангаас ипотекийн зээлд зориулсан мөнгө хэвийн гарч зарцуулагдаж байжээ. Энэ мөнгийг хувийн компанид зээлдүүлэн ашиглуулсан байж магадгүй байгаа аж. Энэ талаар Барилга, хот байгуулалтын дэд сайд Э.Золбоо, “Бидний авсан мэдээллээр бол МИК зургаан хувиас гадна 0.5 хувийг үйл ажиллагааны зардал гэж авдаг. Өнгөрсөн жил түүхэндээ хамгийн өндөр буюу ипотект зориулж гаргасан их наяд төгрөгийн тав орчим тэрбум төгрөг МИК-ын үйл ажиллагааных нь зардалд гарсан. Үүнд, ажилчдынх нь цалин, дулаан, цахилгаан, түрээс зэрэгт зарцуулагддаг. Үүн дээр нэг юмыг сайн шалгаж тодруулаад, сайжруулаад явах ёстой юм. Эрсдэлйн сангийн мөнгө Нөөцийн санд орж байгаа. Энэ мөнгийг сайн шалгаж үзмээр байгаа юм. 2020 онд Ипотекийн зээлийн төлөлтийг хойшлуулахаас өмнө 400 орчим тэрбум төгрөг Нөөцийн санд байгаа гэж байсан. Энэ мөнгө одоо хаана байна вэ. “Юнайтед корпораци” гэл үү нэг компани руу хөрөнгө оруулалт гээд орчихсон гэж байгаа. Үүнд би их гайхаад байгаа.
Эрсдэлийн сангийн мөнгө шүү дээ. Энэ мөнгө дансан дээрээ байх ёстой. Хадгаламжийн хүүгээр өсөж байх ёстой. Гэтэл энэ мөнгө хэвээр байна уу. Компанид хөрөнгө оруулсан гэж байгаа тэр нь юу болсон бэ? Зарцуулсан уу, ашиг олсон уу, үгүй юу? Олсон бол Нөөцийн сандаа эргээд нэмэгдээд явсан уу, эсвэл тухайн компани ашгаа аваад л буцаагаад хийсэн үү?. Өнгөрсөн хоёр жил зээлийн төлөлт хойшилсон ч энэ нь арилжааны банканд төлөх төлөлт хойшилсноос биш Нөөцийн сангаас мөнгө нь гараад яваад байсан гэж ойлгож байгаа. Тэр 400 тэрбум яасан бол. Энжин захирлын хэлж байгаагаар 160 тэрбум гэж байгаа гэж байна” хэмээн онцолжээ
