Японы мэргэжлийн сүмогийн долдугаар сарын Нагоя башё өнөөдөр өндөрлөлөө. Башёгийн сүүлийн өдөр өвдөг шороодолгүй тэмцээнийг хошуучилж явсан их аварга Хакүхо М.Даваажаргал, озэки Тэрүнофүжи Г.Ган-Эрдэнэ нар учраа тааран барилдаж, их аварга котэнагэ мэхээр давлаа. Ийнхүү Хакүхо их аварга мэргэжлийн сүмогийн дээд зиндаанд 45 дахиа түрүүлж, эзэн хааны цомыг өргөлөө. Энэ бол ганц түүний амжилт бус сүмогийн түүхэн дээд амжилтыг нэгээр ахиулсан хэрэг юм.
Жюкрёо зиндаанд мөн монгол сүмоч Миторюү Б.Төрболд түрүүлэв. Тэрбээр 13 даваа, хоёр унаатайгаар ийнхүү зиндаандаа тэргүүлж, ирэх башёд дээд зиндаанд дэвшин барилдахаар боллоо. Мэргэжлийн сүмогийн дээрээсээ гурав дахь макүшита зиндаанд мөн монгол сүмоч түрүүлсэн нь энэ жил 19 настай Хокүсэйхо А.Даваанинж юм. Тэрбээр энэ сард өвдөг шороодолгүйгээр долоон даваа авч магнайлжээ. А.Даваанинж ирэх есдүгээр сарын башёд жюүрёод дэвшин, сэкитори болно.
Энэ сард дээд зиндаанд барилдсан бусад монгол сүмочдын хувьд бүгд 50-иас дээш хувийн амжилт үзүүлж, амжилттай сайн барилджээ. Тухайлбал, маэгаширагийн баруун жигүүрийн хоёроос босож барилдсан Ичиножо А.Ичинноров 10 даваа, таван унаатай, маэгаширагийн баруун жигүүрийн таваас босож барилдсан Хоошорюү С.Нямсүрэн мөн 10 даваа, таван унаатай, маэгаширагийн баруун жигүүрийн зургаагаас босож барилдсан Кирибаяа Б.Лхагвасүрэн есөн даваа, зургаан унаатай, маэгаширагийн зүүн жигүүрийн 11-т эрэмбэлэгдсэн Тамаваши Б.Мөнх-Оргил 11 даваа, дөрвөн унаатай, маэгаширагийн баруун жигүүрийн долоод эрэмбэлэгдсэн Чиёошома Г.Мөнхсайхан найман даваа, долоон унаатай тэмцээнийг өндөрлөв.
