АН-ын дарга, УИХ-ын гишүүн О.Цогтгэрэл “Монгол улсыг үндэслэгч Чингис хаан гэдэг шиг, Ардын хувьсгалын удирдагч Сүхбаатар жанжин гэдэг шиг, Ардчилсан хувьсгалын удирдагч Зориг баатар гэж бид яагаад дуудаж болохгүй гэж?”
1990 оны дөрөвдүгээр сарын 07 буюу одоогоос 31 жилийн өмнөх энэ өдөр Ардчилсан нам анхдугаар их хурлаа хийж байв. Ийм учраас эл өдрийг АН-ын баярын өдөр гэж нэрлэн, дүрэмдээ зааж өгсөн байдаг аж. Энэ жилийн баярын арга хэмжээ С.Зориг агсны хөшөөн дээр болжээ. Энэ үеэр АН-ын шинэ дарга О.Цогтгэрэл хоёр томхон хэмжээний мэдэгдлийг хийв. Тэрбээр АН-аас салсан намууд, задарсан хэсгүүд, татгалзсан гишүүдээ эргэн нэгдэж АН-аа “бүтэн” болгохыг зорьж байгаагаа дуулгалаа. Мөн дөрөвдүгээр сарын 20 буюу С.Зориг агсны төрсөн өдрөөр түүнд Монгол Улсын баатар цолыг нэхэн олгох санаачилгыг Ерөнхийлөгчид хүргүүлэхээ дурдлаа.
Иймд өнөөдрөөс эхлээд ард иргэдийг С.Зоригт улсын баатар цол олгох санаачилгад нэгдэж гарын үсгээ зурахыг уриаллаа. Арга хэмжээнд АН-ын дарга О.Цогтгэрэл, УИХ-ын гишүүн асан З.Нарантуяа, Социал демократ намын анхны дарга Б.Бямбажаргал, дүүргүүдийн АН-ын дарга нарын тэргүүтэй Ардчилсан намын гишүүд оролцжээ.
