ЭМЯ-ны ээлжит мэдээллээр өнгөрсөн 24 цагийн хугацаанд улсын хэмжээнд коронавирусийн нийт 33 тохиолдол бүртгэгдсэнийг онцоллоо. Эдгээр тохиолдол бүгд нийслэл Улаанбаатар хотод бүртгэгдсэн байна. Тохиолдлуудыг нарийвчилбал, Цэргийн төв эмнэлгийн эмч, сувилагч хоёрт коронавирус илэрсэн бөгөөд бусад 31 тохиолдол нь өмнөх голомттой холбоотой, өөрөөр хэлбэл гэр бүлийн голомтны, “Мөнххада” компанийн, “Ачтан” эмнэлгийн ажилчдын, Баянзүрх дүүргийн нэгдсэн эмнэлгийн зэрэг голомтны гэр бүлийн хавьтлуудаас илэрчээ.
Халдварын шинэ тохиолдлуудаас харахад орцны хавьтлууд их байгаа бөгөөд Баянгол дүүргийн 6-р хороонд нэг орцны зургаан хүн коронавирусийн халдвар авсан нь тогтоогджээ. Тус хорооны 63, 43, 57 дугаар байруудад өвчлөл голомтлон гарч байга аж. “Ачтан” эмнэлгийн ажилчдын байр байдаг тул үргэлжилсэн голомт үүссэн гэж үзэж Баянгол дүүргийн 5, 6 дугаар хорооны бүх айл өрхийн иргэдэд PCR шинжилгээ хийж эхэлсэн байна.
