Улаанбаатар-Увс чиглэлийн хот хоорондын автобусны жолооч зорчигчоо цасан шуурганаар, хээр буулгаж үлдээсэн гэх мэдээллийг олон нийтийн сүлжээнд түгээжээ. Энэ мэдээлэл үнэн эсэхийг АТҮТ-ийн Хөдөлгөөний удирдлагын хэлтсийн дарга К.Айдос “Энэ асуудлыг шалгаж, тодруулсан. Тухайн тээвэрлэлтийг гүйцэтгэсэн жолооч болон замд буусан хоёр зорчигчтой холбогдож тайлбар авлаа. Увс аймгийн Хяргас сум орох гэж байсан хоёр зорчигч Хар тэрмэс гэж газраас наана 45-т км хээр газар бууна гэсэн боловч жолооч Ууганхүү эзгүй хээр газар үлдээхгүй гээд цаашаа явж Хар тэрмэсийн амралтын газар буулгасан байна. Жолооч аймаг, сумын онцгой комисст үүнийгээ мэдэгдсэн” гэсэн тайлбар өгчээ.
Болсон явдлыг тодруулахад тухайн зорчигчдыг Хэр тэрмэсийн амралтын газар голомттой газраас ирсэн гэж үзээд оруулалгүй гадаа зогсоосон юм байна. Тухайн зорчигчдыг халдвар хамгааллын дэглэмийн дагуу албаны хүмүүс тосч авч, дэглэм сахиулж гэрт нь хүргэх байсан боловч энэ журмыг мөрдөөгүй ажээ. Зургийг зорчигчдын байгаа айлын хүн аваад нийгмийн сүлжээнд оруулахдаа бодит бус тайлбартай нийтэлсэн нь олон нийтэд буруу ойлголт төрүүлсэн байна.
