Улсын хилийн бүрэн бүтэн байдалд эргэлзээ төрүүлэх, иргэд олон нийт болон хилчид, цаашилбал төр, засгийн хооронд үл ойлголцол үүсгэж мэдэх илт худал мэдээллийг сүүлийн хоёр жил гаруйн хугацаанд тодорхой давтамжтай цацах болжээ. Үүнтэй холбогдуулан Хил хамгаалах ерөнхий газраас мэдэгдэл гаргасан байна.
Уг мэдэгдэлд “Хятадууд манай 200 км хилийн торыг тасалж, ашигт малтмал хайж байна” гэх худал мэдээллийг 2018 оны 11 дүгээр 28-ны өдөр “Босоо хөх Монгол” бүлгэм, Munkhbayr Ch, “Ноцтой мэдээ” гэх хаягнаас цахим орчинд нийтэлж байсан. Уг мэдээллийг “Batnyam Batangaa”, “Khayankhyarvaa Munhbat” гэх хаягтай фэйсбүүк хэрэглэгчид 2020 оны 12 дугаар сарын 12-ны өдөр шэйрлэж, цахим орчинд түгээж байна. Хил хамгаалах байгууллага нь ашигт малтмалын үйл ажиллагаа явуулах ямар нэгэн тусгай зөвшөөрөл олгодоггүй бөгөөд Монгол Улсын Засгийн газрын “Бүтээгдэхүүн хуваах гэрээ байгуулах эрх олгох тухай” 337 дугаар тогтоол, Уул уурхай хүнд үйлдвэрийн яамны “Аж ахуйн үйл ажиллагааны 114 дүгээр тусгай зөвшөөрөл”-ийг үндэслэн Монгол Улсын Засгийн газартай бүтээгдэхүүн хуваах гэрээ байгуулсан “Макс ойл” ХХК-ийн хилийн зурваст явуулж байсан үйл ажиллагааг “Улсын хил хамгаалалтын эрх ашгийг хөндөж байгаа” үндэслэлээр 2018 оны 11 дүгээр сарын 25-ны өдрөөс зогсоож, тухайн хилийн хэсэгт хилийн харуул, хянах цамхаг, 152,6 км өргөст торон саад, мөр хянах зурвас шинээр байгуулж, хил хамгаалалтын нягтралыг нэмэгдүүлсэн. Одоо тухайн хэсэгт ямар нэгэн ажил, үйлдвэрлэл явуулж байгаа аж ахуйн нэгж, иргэн байхгүй болохыг албан ёсоор мэдэгдэж байна” гэжээ.
