Аймаг, нийслэл, сум, дүүргийн ИТХ-ын ээлжит сонгуулийн санал хураалтыг ирэх аравдугаар сарын 15-ны өдөр явуулахаар УИХ-аас товлон зарласан. Ийнхүү орон нутгийн сонгуулийн бэлтгэл ажлууд цаг хугацааны хуваарийн дагуу явагдаж байгаа ажээ. Орон нутгийн сонгуулийн тухай хуулийн дагуу уг сонгуульд нэр дэвших төрийн албан хаагчид наймдугаар сарын нэгнээс өмнө ажлаасаа чөлөөлөгдөх ёстой. Хуульд заасан энэ хугацаа өнөөдрөөр тасалбар болон дуусч байгаа гэсэн үг.
Түүнчлэн орон нутгийн сонгуульд оролцох нам, эвслүүд энэ талаарх хүсэлтээ наймдугаар сарын 16-наас өмнө тухайн нутаг дэвсгэрийнхээ сонгуулийн хороонд хүргүүлэх ёстой. Харин нэр дэвшүүлэх ажиллагаа сонгуулийн санал хураалт болох өдрөөс 45 хоногийн өмнө эхэлж долоо хоногийн хугацаанд дуусах хуулийн заалттай. Энэ дагуу орон нутгийн сонгуулийн нэр дэвшүүлэх үйл явц наймдугаар сарын 31-нээс есдүгээр сарын 6-ны хооронд өрнөнө.
Мөн иргэдийн шилжих хөдөлгөөнийг сонгууль болохоос 60 хоногийн өмнө буюу наймдугаар сарын 15-наас зогсоох юм.
