Үндэсний их бүтээн байгуулалт Тавантолгой-Зүүнбаян чиглэлийн 414.6 км төмөр замын төслийн туслан гүйцэтгэгч компаниудын нэг “Туулын гүүр далай” ХХК өнөөдөр 132.38 урт метр төмөр бетон гүүрийн дам нурууг угсарч дуусгажээ. Тус компанийн хариуцсан энэ гүүр нь Тавантолгой-Зүүнбаян чиглэлийн 414.6 км трассын 369 дүгээр цэг дээр байршиж байгаа юм байна.
Төслийн хүрээнд нийт 27 төмөр бетон гүүр барьж байгуулахаас өнөөдрийн байдлаар 52 хувийн гүйцэтгэлтэй үргэлжилж байгаа аж. Төсөл хэрэгжүүлэгчээр “Монголын төмөр зам” ТӨХК, хяналтын зөвлөхөөр “Тавантолгой төмөр зам” ХХК, доод бүтцийн гүйцэтгэгч Зэвсэгт хүчний жанжин штаб, дээд бүтцийн гүйцэтгэгчээр “Улаанбаатар төмөр зам” ХНН-ийнхэн болон туслан гүйцэтгэгчээр дотоодын аж ахуйн нэгжүүд ажиллаж байгаа юм.
