Дорнод аймгийн Баяндун сумын “Түргэн” багийн малчин Б.Мөнхжаргал энэ жил Монгол Улсын аварга малчнаар тодорсон. Тэдний гэр бүл 19 өрхийг малжуулсан төдийгүй Монголын улаан загалмайн нийгэмлэгийн үйл ажиллагааг дэмжиж, хамтарч ажилладаг байна.
Түүнчлэн Монгол Улсын аварга малчин Б.Мөнхжаргалын гэр бүл өөрсдийн санаачилга, сэтгэл зүтгэлээр Буриад өв соёлын гэр музей байгуулжээ. Энэхүү гэр музей нь нутгийн өв уламжлал, зан заншил, эд өлгийн зүйлсийг хадгалан хамгаалж, хойч үедээ өвлүүлэн үлдээхэд үнэтэй хувь нэмэр оруулж буйгаараа онцлог юм.
УИХ-ын гишүүн Л.Соронзонболд, аймгийн ИТХ-ын дарга Г.Цолмон, аймгийн Засаг даргын орлогч Ч.Ганбат болон орон нутгийн удирдлагууд малчны хотонд зочлон, буриад түмний түүх соёл, ахуй амьдралын онцлогийг харуулсан үзмэрүүдтэй танилцсан байна.
