Английн Лондон хотын амьтны хүрээлэн өчигдрөөс ан амьтдаа тоолж эхэлжээ. Тус амьтны хүрээлэн жил бүр ийнхүү амьтдаа тоолдог уламжлалтай. Ингэхдээ амьтны хүрээлэнгийн бүх хөхтөн амьтан, шувуу, хэвлээр явагч, загас, сээр нуруугүй амьтад гээд нийт 580 төрөл, зүйлийн амьтдыг бүгдийг нь тоолдог байна. Лондонгийн амьтны хүрээлэнгийн анхны амьтад нь хумболдт оцон шувуунууд болон Хайди, Инди, Руби, Бхану нэртэй нэн ховордсон Азийн арслангууд ажээ. Өнгөрсөн 2019 онд тус амьтны хүрээлэнд зэрлэг амьтдын хууль бус наймаанаас аврагдсан 40 ширхэг Африкийн аварга том эмгэн хумс, дөрвөн далайн гахай, мөн дөрвөн том толгойт яст мэлхийгээр бүл нэмсэн гэнэ. Өчигдөр эхэлсэн тооллогын явцаас харахад Лондонгийн амьтны хүрээлэнд Боливоос авчирсан хар үст сармагчин 18, Төв Азийн говиос аваачсан бактриан буюу хоёр бөхт тэмээ хоёр байгаа ажээ. Өнгөрсөн жилийн тооллогоор тус амьтны хүрээлэнд 19,035 орчим амьтан тоологдсон юм байна.
Байгаль хамгаалах, үржлийн хөтөлбөрийг удирдахад ашигладаг тусгай төрөл болох Species360 хэмээх мэдээллийн баазаар дамжуулан бүх мэдээллийг дэлхийн бусад амьтны хүрээлэнгүүдтэй хуваалцдаг.
