Хэнтий аймагт түүхэн аялал жуулчлалын авто зам, сумдыг авто замаар холбох ажлууд үргэлжилж байна. 2024 онд Бор-Өндөр-Хэрлэн, Жаргалтхаан-Дэлгэрхаан, Өмнөдэлгэр-Биндэр чиглэлийн авто замууд шинээр баригдаж эхэлж буй. Ингэснээр Баянмөнх, Дархан, Баян-Адарга сумд, Гурванбаян тосгоныг авто замаар холбох боломж бүрдэх юм.
Тэгвэл хоёр жилийн өмнө эхэлсэн Жаргалтхаан-Өмнөдэлгэр сум чиглэлийн 52,5 км хатуу хучилттай авто зам ирэх 10 дугаар сард ашиглалтад орно гэдгийг албан сурвалж мэдээллээ.
“Тэгшт Плант компани” гүйцэтгэж буй тус авто замын онцлог нь 22 см хөлдөлтөөс хамгаалах үе, 15 см хөрсийг цементээр бэхжүүлсэн суурь, 15 см буталсан чулууг цементээр бэхжүүлсэн суурь, 5 см асфальт бетон хучилтын хийцлэл бүхий 8 м өргөн зорчих хэсэгтэй авто зам барилгын ажил юм.
