Японы мэргэжлийн сүмогийн хаврын барилдаан буюу харү башё эхлээд дөрөв хонож байна. Дөрөв дэх өдөр монгол сүмочдод халгаатай байлаа. Их аварга Тэрүнофүжи Г.Ган-Эрдэнэ маэгаширагийн хоёр дахь бөх Мэйсэйд унав. Озэки Киримшима Б.Лхагвасүрэн өнөөдөр маэгаширагийн тэргүүн бөх Асоноямад унаснаар дараалан дөрөв унаж, башёг амжилт муутай эхлүүлж байна. Харин озэки Хоошорюү С.Бямбасүрэн маэгаширагийн гурав дахь бөх Охог давснаар 3 даваа, нэг унаатай болов. Маэгаширагийн долоод эрэмбэлэгдэн барилдаж буй Тамаваши Б.Мөнх-Оргил өнөөдөр учраагаа өвдөг шороодуулж анхны даваагаа авав.
Осакад болдог хаврын тэмцээн харү башё гэнэтийн явдлаар дүүрэн байдаг тул япончууд “ареру хару башё” буюу “хаврын шуургатай учрал” гэж нэрлэдэг байна. Харү башёгоос шинэ аваргууд төрж, эсвэл өндөр цолтнууд санаанд оромгүй муу барилдаан үзүүлдгээрээ алдартай гэнэ. Энэ жилийн харү башё мияагино дэвжээнд болсон үйл явдлын дуулиантай эхэлж байгаа бөгөөд Японы хэвлэлүүд “Осакагийн башё дуулиан шуугиан, муу мэдээгээр эхэллээ” гэж бичиж байна.
