БНХАУ-ын соёлын өдрүүд Монгол Улсад жил бүр уламжлал болгон зохион байгуулагддаг. Ковид цар тахлын улмаас хоёр жил тасалдсан уг арга хэмжээ энэ жил “Хятад орныг танин мэдэх” Өвөрмонголын соёлын өдрүүд нэрийн дор наймдугаар сарын 30-наас есдүгээр сарын 04-ний өдрүүдэд Улаанбаатар хотноо зохион байгуулагдах гэж байна. Соёлын өдрүүдийн нээлтийн үйл ажиллагаа наймдугаар сарын 30-нд Соёлын төв өргөөнд болно. Нээлтийн үеэр “Зэвсгийн эрдэм” Шаолин Үшүгийн тусгай тоглолтыг толилуулахаар бэлтгэжээ. Энэхүү тоглолт Соёлын төв өргөөнд хоёр өдөр дараалан олон нийтэд хүрнэ.
Соёлын өдрүүдийн хүрээнд Өвөрмонголын уламжлалт эмнэлгийн эмч нар үзлэг, оношилгоо, эмчилгээ хийх юм байна. Тодруулбал, наймдугаар сарын 31-нд Клиникийн хоёрдугаар эмнэлэгт, есдүгээр сарын 01-нд Налайх дүүрэгт өвөрмонголын уламжлалт эмнэлгийн эмч нар үзлэг хийх гэнэ.
Зургаан өдрийн турш үргэлжлэх соёлын өдрүүдийн хүрээнд “Тэнгис”, IMAX кино театрт хятад киноны өдөрлөг болно. Мөн дууны уралдаан, гала тоглолт зохион байгуулах юм байна.
