“Синьхуа” агентлагийн мэдээлснээр, Британийн музейн захирал Хартвиг Фишер 25-ны өдөр албан тушаалаасаа огцрохоо зарлаж, музей өмнө нь цуглуулгын алдагдлыг бүрэн шалгаж чадаагүйн хариуцлагыг хүлээжээ.
Фишер 25-ны өдөр хийсэн мэдэгдэлдээ, Британийн музей 2021 онд холбогдох сэрэмжлүүлгийг хүлээн авсны дараа иж бүрэн хариу өгөөгүй бөгөөд “Үүргээ биелүүлээгүйн хариуцлагыг эцэст нь захирал заавал хүлээх ёстой” гэжээ.
Британийн музей өнгөрсөн долоо хоногт цуглуулгын зарим хэсэг нь “алга болсон, хулгайлагдсан, гэмтсэн” болохыг олж мэдээд нэг ажилтнаа ажлаас нь халж, цагдаа дуудсан гэдгээ нотолжээ. Алдагдсан цуглуулгад манай тооллын өмнөх 15-р зуунаас манай тооллын 19-р зуун хүртэлх алтан үнэт эдлэл, шилэн эдлэл хэрэгслүүд байжээ.
Урлагийн бүтээлийн наймаачин болон Британийн музейн хооронд илгээсэн цахим шуудангийн баримтаас үзэхэд музейд цуглуулгууд алдагдаж болзошгүй талаар хоёр жилийн өмнө мэдэгдсэн болохыг BBC өмнө нь мэдээлж байсан. BBC-ийн мэдээлснээр цуглуулгаас 1500 гаруй эд зүйлсийг хулгайлсан, гэмтээсэн, устгасан байна.
