Засгийн газрын өнөөдрийн ээлжит хуралдаанаар баруун босоо буюу Шивээхүрэн-Сэхэ чиглэлийн нарийн царигтай төмөр замын бүтээн байгуулалтыг гүйцэтгэх эрхийг “Нарийнсухайтын төмөр зам” ХХК-д олгохоор шийдвэрлэжээ. Бүтээн байгуулалтын ажлыг энэ тавдугаар сард эхлүүлж, энэ оны 10 дугаар сарын сүүлээр ашиглалтад оруулахаар төлөвлөж байгаа юм байна. Энэхүү гол төмөр замын нийт урт нь 7 км, салаа төмөр зам нь 20 орчим км байх юм.
Хувийн хэвшлийн 200 тэрбум гаруй төгрөгийн хөрөнгө оруулалтаар энэ төмөр замыг барьж, 6 жилийн хугацаанд ашигласны дараа “Монголын төмөр зам” компанид 100 хувь төлбөргүй шилжүүлж өгөх нөхцөлтэй аж. Одоогийн байдлаар баруун босоо төмөр зам буюу Арцсуурь-Нарийнсухайт-Шивээхүрэн чиглэлийн 1250 км төмөр зам барих сонгон шалгаруулалт дууссан. Барилга угсралтын ажлыг энэ оны гуравдугаар улиралд багтаан эхлүүлэхээр төлөвлөөд байна. Мөн Гашуунсухайт-Ганцмод чиглэлийн мухар төмөр замын холболтын төмөр замыг барих ТЭЗҮ боловсруулах сонгон шалгаруулалт явуулж, БНХАУ-ын Төмөр замын 2-р товчоо шалгараад байна.
Түүнчлэн, зүүн босоо чиглэлийн Хөөт-Бичигт-Зүүнхатавч чиглэлийн 426 км төмөр замын барилга угсралтын ажлыг эхлүүлэх гэрээг ирэх 6 дугаар сард хийнэ. Хил холболтын төмөр зам баригдсанаар мухар замууд мухардлаас гарна. Зүүн, баруун босоо төмөр замуудыг барьж урд, хойд хөрш, Ази, Европыг холбосон төмөр замын коридороо нэмэх юм.
