Самар бэлтгэх, ашиглах зөвшөөрөл авч ажиллахдаа хуш модонд механик гэмтэл учруулсан 19 аж ахуйн нэгжийг ирэх долоо хоногт хуулийн байгууллагад шилжүүлэхээр болжээ. Мөн зориулалт өөрчлөн Архангай аймгийн Цэнхэр суманд 62.4 тн, Ихтамир суманд 50.5 тн, Тариат суманд 64.7 тн хуш модны самрыг бэлтгэж ашиглуулсан албан тушаалтнуудад хариуцлагын арга хэмжээг авч хуулийн байгууллагад шилжүүлнэ гэдгээ БОАЖ-ын сайд Б.Бат-Эрдэнэ мэдэгдлээ.
Тухайн байгууллагууд нь хуш модны самрыг өөрсдийн ажилчдаар түүж бэлтгүүлээгүй, хуш модны самрыг түүж бэлтгэхдээ байгаль орчинд халгүй арга технологийг ашиглаагүйн улмаас хуш модонд механик гэмтэл учруулсан, байгаль орчныг доройтуулсан /хог хаягдал үлдээх гэх мэт/, нөөцийг бэлтгэж ашигласан талбайг актаар хүлээн авч дүгнээгүй зэрэг зөрчлүүд нийтлэг илэрчээ.
Удахгүй бусад аймгуудад зөвшөөрөл авч ажилласан аж ахуйн нэгжүүдийн хяналтыг хийх юм байна. Архангай аймгийн Цэнхэр, Ихтамир, Тариат сумдад хуш модны самар түүж бэлтгэх, ашиглалтад тавих хяналтыг эрчимжүүлэх чиглэлээр салбар хоорондын уялдааг хангаж Экологийн цагдаагийн алба, Монголын байгаль орчны иргэний зөвлөл ТББ, ШУА-ын Газарзүй геоэкологийн хүрээлэн, Хэвлэл мэдээллийн алба болон Мэргэжлийн хяналтын газартай хамтран хяналт, шалгалтын ажлыг гүйцэтгэж байгаа юм байна.
