Хэлний бодлогын үндэсний зөвлөлөөс Албан бичгийн хэвлэмэл хуудасны стандарт гаргаж, 5 аймаг, 10 газар турших ажлыг өнгөрсөн тавдугаар сард эхлүүлсэн юм байна. Улмаар 21 аймаг, 9 дүүрэг хэвлэмэл хуудсаа харьяа архивын газраараа хийлгэж дуусчээ. Энэ 10-12 дугаар сард багтан архив бичиг хэргийн ажилчдад хэвлэмэл хуудсыг хэрхэн ашиглах, хэрхэн бичих, турших сургалтууд зохион байгуулах юм байна.
Монгол хэлний тухай хуульд “үндэсний бичгийн хөтөлбөрийг үе шаттай хэрэгжүүлж, зохих бэлтгэл хангасны үндсэн дээр төрийн болон нутгийн өөрөө удирдах байгууллага албан хэргээ кирил болон үндэсний хос бичгээр хөтлөн явуулна” гэсэн заалт бий бөгөөд уг заалтыг 2025 оны нэгдүгээр сарын 01-нээс мөрдөж эхлэх юм. Өөрөөр хэлбэл хоёр жилийн дараа Монгол Улс даяар төрийн болон нутгийн өөрөө удирдах байгууллага албан бичгээ кирил болон үндэсний хос бичгээр хөтлөн явуулна.
